ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილი ღონისძიებების ფარგლებში საბუნებისმეტყველო მეცნიერებათა და ჯანდაცვის ფაკულტეტის კლინიკური ქირურგიის დეპარტამენტის პროფესორმა კახაბერ ქაშიბაძემ საჯარო ლექცია წაიკითხა თემაზე: „ღვიძლის ტრანსპლანტაციის მსოფლიო და ქართული გამოცდილება“. მომხსენებელმა სტუდენტებს, პროფესორ-მასწავლებლებსა და დაინტერესებულ პირებს დარგის მიღწევები და აქტუალური საკითხები გააცნო. ლექციის დასასრულს პროფესორმა კახაბერ ქაშიბაძემ შეკითხვებს უპასუხა.

ჰოსპისისა და პალიატიური მზრუნველობის საერთაშორისო დღისადმი მიძღვნილი სამდღიანი სტუდენტთა სამეცნიერო-პრაქტიკული კონფერენცია „უჩინარი პაციენტები, უჩინარი სიცოცხლე“ გაიხსნა ბათუმის შოთა რუსთაველის სახელმწიფო უნივერსიტეტში. სესიაზე საბუნებისმეტყველო მეცნიერებათა და ჯანდაცვის ფაკულტეტის სტუდენტები ისეთ საკითხებს გაეცნობიან, როგორიცაა: პალიატიური მზრუნველობის ადგილი ჯანდაცვის სისტემასა და საუნივერსიტეტო სამედიცინო განათლებაში და რეგიონული პალიატიური მზრუნველობის სამსახური - აჭარის ა.რ. გამოცდილება.

საბუნებისმეტყველო მეცნიერებათა და ჯანდაცვის ფაკულტეტის ფარმაციის დეპარტამენტის ორგანიზებით ქართული ფარმაციის დღე უნივერსიტეტის 80 წლის იუბილესადმი მიძღვნილი ვორქშოფით „ქართული ფარმაციის წარსული, აწმყო, მომავალი“ აღინიშნა. ღონისძიებაზე პროფესორმა მარინა ქორიძემ, ასოცირებულმა პროფესორმა ეთერ ჯაყელმა, ნატო სურმანიძემ და ვლადიმერ მახარაძემ ფარმაციის სპეციალობის პერსპექტივებზე იოველ ქუთათელიძის მოღვაწეობასა და მის მიერ ქართული ფარმაციის განვითარებაში შეტანილ უდიდეს წვლილზე, XXI საუკუნის აფთიაქზე და ახალ პროფესიებზე ისაუბრეს. ვორქშოფზე ფარმაციის სპეციალობის სტუდენტებმა მოხსენებები წარმოადგინეს თემებზე: „ქართული ფარმაციის ისტორიის კვალდაკვალ“, „საოჯახო აფთიაქი“, „მედიცინა და ფარმაცია ხატოვან აზროვნებაში“. ღონისძიების ფარგლებში ფარმაციის თემატიკაზე გამოცემული უახლესი ლიტერატურის გამოფენა-გაყიდვა მოეწყო.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის ორგანიზებით, აჭარის ა.რ განათლების, კულტურისა და სპორტის სამინისტროს დაფინანსებითა და ქალაქ ბათუმის მერიის თანადაფინანსებით საერთაშორისო საზაფხულო სკოლა „ეკოლოგიური ცნობიერება და გარემოსდაცვითი განათლება“ იმართება. საზაფხულო სკოლის ფარგლებში ლექციები და პრაქტიკული მეცადინეობები ჩატარდება ისეთ აქტუალურ თემებზე, როგორიცაა: გენმოდიფიცირებული პროდუქტების წარმოება და მოსალოდნელი რისკები, ევროკავშირის გამოცდილება ნარჩენების მართვაში, სამეცნიერო კვლევები ნარჩენების მართვის მიმართულებით, შავი ზღვის ეკოლოგიური პრობლემები და ჩამდინარე წყლების მართვა

ბათუმის შოთა რუსთაველის სახელმწიფო უნივერსიტეტში V საერთაშორისო სკოლა-სემინარი „ბიომედიცინის აქტუალური საკითხები’’გაიხსნა. 10 ქართველი და უცხოელი პროფესორი ოთხი დღის განმავლობაში ჩაატარებს ლექციებს, მასტერ-კლასებსა და ლაბორატორიულ მეცადინეობებს დარგის აქტუალურ საკითხებზე. საქართველოს უმაღლესი სასწავლებლების ბიოლოგიური და სამედიცინო პროფილის 60-მდე სტუდენტი, დოქტორანტი და რეზიდენტი გაეცნობა ცხოვრების ჯანსაღ წესს, ბიოსუფრთხოებას, ბიოეთიკური პრინციპებისა და ნორმების დაცვის მნიშვნელობას ბიოსამედიცინო საქმიანობაში, ადამიანთა პოპულაციების ბიოლოგიური ბანკების შექმნის მნიშვნელობას ფუნდამენტური კვლევებისა და პერსონალიზებული მედიცინის განვითარებისათვის და ეთნობოტანიკური კვლევების მნიშვნელობას ბიომედიცინაში.