კავკასიის რეგიონული ეკოლოგიური ცენტრის დირექტორმა სოფიკო ახობაძემ ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებსა და პროფესორ-მასწავლებლებს პროექტი „სუფთა მდინარეები - სუფთა ზღვა!“ წარუდგინა. და ევროკავშირის პროგრამებში მონაწილეობა შესთავაზა. მომხსენებელმა შავი ზღვის ეკოლოგიური მდგომარეობა შეაფასა და მიმდინარე პროგრამებზე ისაუბრა. პროექტი ევროკავშირის დაფინანსებით ხუთ ქვეყანაში: საქართველოში, რუმინეთში, ბულგარეთში, თურქეთსა და მოლდოვეთში ხორციელდება. პროგრამა ითვალისწინებს არასამთავრობო ორგანიზაციებსა და სხვა დაინტერესებულ მხარეთა შორის თანამშრომლობის გაძლიერებას, წყლის დაბინძურების წინააღმდეგ ბრძოლის გამოცდილების გაზიარებას, საზოგადოების ცნობიერების ამაღლებასა და გააქტიურებას.

ბიომრავალფეროვნების საერთაშორისო დღე ბიოლოგიისა და ეკოლოგიის სპეციალობის სტუდენტებმა და პროფესორ-მასწავლებლებმა რამდენიმე ღონისძიებით აღნიშნეს. ბათუმის ბოტანიკურ ბაღში ბათუმის მერს გიორგი ერმაკოვს, გარემოს დაცვისა და ბუნებრივი რესურსების სამმართველოს ხელმძღვანელს ვახტანგ წულაძეს შეხვდნენ და საჯარო ლექცია მოისმინეს თემაზე: „ბოტანიკური ბაღის ისტორია და ჩრდილო ამერიკული ფიტოგეოგრაფიული განყოფილების მრავალფეროვნება“. შეხვედრის დასასრულს ახალგაზრდებმა მსოფლიოს წითელ ნუსხაში შესული მცენარე არაუკარიას ნერგები დარგეს და თესლების გაცვლითი ფონდისა და ბოტანიკური ბაღის ადგილობრივი ფლორის განყოფილების მუშაობას გაეცნენ.

შოთა რუსთაველის ეროვნული სამეცნიერო ფონდის „კვლევები მოსწავლეთა მონაწილეობით“ დაფინანსებული პროექტის (№SC/23/7-100/14) ფარგლებში ბათუმის №2 საჯარო სკოლაში ჩატარდა პოსტერული სასტენდო კონფერენცია თემაზე: „ჩვენ ვირჩევთ ცხოვრების ჯანსაღ წესს“. ღონისძიებაში მოსწავლეებთან ერთად ბათუმის შოთა რუსთაველის სახელმწიფო უნივერსიტეტის ბიოლოგიის II კურსის სტუდენტებმა მიიღეს მონაწილეობა. მოსწავლეებმა სესიაზე პროექტის მიმდინარეობა და შედეგებზე შეაფასეს, საზოგადოებას სიგარეტის ანტირეკლამა შესთავაზეს და მოზარდებს ბუკლეტები დაურიგეს. პროექტის ლიდერთა ჯგუფმა (ხელმძღვანელი: ასოცირებული პროფესორი მარინა ნაგერვაძე, თანახელმძღვანელი: ქ. ბათუმის №2 საჯარო სკოლის ბიოლოგიის მასწავლებელი სემაელ მიქელაძე, ასისტენტი – ასისტენტ პროფესორი ლალი ჟღენტი) პროექტის ღირებულებებზე, ნაკლოვანებებსა და პერსპექტივებზე ისაუბრა.

15 – 16 მაისს ქუთაისის აკაკი წერეთლის სახელმწიფო უნივერსიტეტის უწყვეტი განათლების ცენტრში გაიმართა ტრენინგი თემაზე: ,,სწავლებისა და შეფასების თანამედროვე მეთოდები’’ სადაც განხილული იქნა შემდეგი საკითხები: ეფექტური და ინტერპერსონალური კომუნიკაცია, სწავლების ინტერაქტიური მეთოდები, ტესტების შედგენისა და შეფასების წესები, ტუტორიალი-პრობლემაზე დაფაფუძნებული სწავლების (PBL) ძირითადი ელემენტი, ქეისებით სწავლება და შეფასება, სიტუაციური ამოცანები, როლური თამაში, მიზნობრივი წერითი ნაშრომი.
ტრენინგს უძღვებოდნენ ქუთაისის აკაკი წერეთლის სახელმწიფო უნივერსიტეტის პროფესორები: ნანა შონია, ნატო ქობულაძე, ია ჩხეიძე, რომლებსაც აქვთ ტრენერის შესაბამისი კვალიფიკაცია. ტრენინგში მონაწილეობდნენ ბათუმის შოთა რუსთაველის სახელმწიფო უნივერსიტეტის პროფესორები: მარინა ქორიძე, რუსუდან ხუხუნაიშვილი, ასოცირებული პროფესორები ლეილა ახვლედიანი, ნინო ლომთათიძე, ნანი გვარიშვილი.

საბუნებისმეტყველო მეცნიერებათა და ჯანდაცვის ფაკულტეტს ანკარის „Apeksgroup“-ის ასოციაციის წარმომადგენლები ეწვივნენ. სტუმრებმა ფაკულტეტის ადმინისტრაციასთან გამართულ შეხვედრაზე სამომავლო თანამშრომლობის მიმართულებებზე ისაუბრეს. იგეგმება 2016 წლის 18-22 მაისს ბათუმში ოჯახის ექიმთა საერთაშორისო კონგრესის ჩატარება. დელეგაციის წევრებმა სურვილი გამოთქვეს კონგრესში ბათუმის შოთა რუსთაველის სახელმწიფო უნივერსიტეტი ჩაერთოს როგორც საორგანიზაციო ისე აკადემიური აქტივობის თვალსაზრისით. საერთაშორისო კონფერენციაში მონაწილეობის მიღება შეეძლებათ ამ მიმართულებით მომუშავე სამედიცინო სფეროს წარმომადგენლებს, უნივერსიტეტის პროფესორ-მასწავლებლებსა და დოქტორანტებს.