27-31 მაისს ბათუმის შოთა რუსთაველის სახელმწიფო უნივერსიტეტის რექტორის მოადგილე ნათია წიკლაშვილი, ეკონომიკის და ბიზნესის ფაკულტეტის ხარისხის უზრუნველყოფის სამსახურის უფროსი, პროფესორი ასიე ცინცაძე და ეკონომიკის დეპარტამენტის მოწვეული მასწავლებელი უჩა სურმანიძე პოლონეთში, კრაკოვის ეკონომიკურ უნივერსიტეტსა და ვროცლავის უნივერსიტეტში იმყოფებოდნენ. ვიზიტის ფარგლებში შეხვედრა შედგა კრაკოვის უნივერსიტეტის პრორექტორთან პროფესორ ალექსი პოცზდოვსკისთან, საერთაშორისო ვაჭრობის დეპარტამენტის უფროსთან პროფესორ კრისტოფ ვოჩთან და სხვა აკადემიურ პერსონალთან. დაიგეგმა ოქტომბერში ქართულ-პოლონური სამეცნიერო სემინარისა და პოლონელი პროფესორების საჯარო ლექციების ჩატარება, ერთობლივი სასწავლო და სამეცნიერო აქტივობების განხორციელება.

ეკონომიკისა და ბიზნესის ფაკულტეტის ასოცირებულმა პროფესორმა მურმან ცეცხლაძემ მონაწილეობა მიიღო 21-24 მაისს, კიევის ტარას შევჩენკოს სახელობის ეროვნული უნივერსიტეტის მიერ ორგანიზებულ საერთაშორისო ფორუმში „ეკონომიკა, ფინანსები, ბიზნესი, მენეჯმენტი 2019“. ფორუმის მუშაობაში ჩართული იყო ათზე მეტი ქვეყნის 500-ზე მეტი წარმომადგენელი. კონფერენციის ფარგლებში მოეწყო 25 პლენარული დისკუსია, რომელთაგან ერთ-ერთის - „XXI საუკუნის სტატისტიკა: ახალი გამოწვევები და პერსპექტივები“ სპიკერი იყო მურმან ცეცხლაძე.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის მოწვეულმა მასწავლებელმა თამარ ფოლადაშვილმა ერაზმუს+-ის პროგრამის ფარგლებში (პროფესიული განვითარება) რუმინეთში, სუჩეავას სტეფან სელ მარეს უნივერსიტეტში ლექციები ჩაატარა. ერთი კვირის განმავლობაში მას ასევე ჰქონდა შეხვედრები ეკონომიკისა და საჯარო ადმინისტრირების ფაკულტეტის წევრებთან და სხვა უნივერსიტეტებიდან მოწვეულ აკადემიურ პირებთან.

საერთაშორისო სამეცნიერო-პრაქტიკული კონფერენცია „გლობალური მარკეტინგი: თანამედროვეობის ანალიზი და გამოწვევები“ გაიხსნა ბათუმის შოთა რუსთაველის სახელმწიფო უნივერსიტეტში. ორდღიანი კონფერენციის მიზანია მარკეტინგის ინოვაციურ პროცესებში არსებული აქტუალური ტრენდების კომპლექსური ანალიზი მსოფლიო ეკონომიკის თანამედროვე პირობებში და მათი პრაქტიკული დანერგვის ხელშეწყობა. „გლობალური მარკეტინგი: თანამედროვეობის ანალიზი და გამოწვევები“ ბათუმის შოთა რუსთაველის სახელმწიფო უნივერსიტეტის, ეკონომიკური კვლევების ეროვნული ინსტიტუტის და უკრაინის ეროვნული საავიაციო უნივერსიტეტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასოცირებულმა პროფესორმა ბესიკ ბაუჩაძემ 15-17 მაისს მონაწილეობა მიიღო პოლტავის იური კონდრატიუკის სახელობის ეროვნული ტექნიკური უნივერსიტეტის ორგანიზებით გამართულ საერთაშორისო კონფერენციაში „სახელმწიფოს ეკონომიკური განვითარება და სოციალური სტაბილურობა“, სადაც წარადგინა მოხსენება თემაზე: „ესტონური მოდელი და საგადასახადო რისკები“. ასოცირებულმა პროფესორმა ბესიკ ბაუჩაძემ ასევე მონაწილეობა მიიღო 21-24 მაისს, ამავე უნივერსიტეტის მიერ ორგანიზებულ საერთაშორისო სამეცნიერო კონფერენციის „BUILDING INNOVATIONS – 2019“ პლენარულ და სექციურ მუშაობაში. კონფერენციაში ჩართული იყო სამი ქვეყნის 100-ზე მეტი წარმომადგენელი.