საერთაშორისო სამეცნიერო-პრაქტიკული კონფერენცია „გლობალური მარკეტინგი: თანამედროვეობის ანალიზი და გამოწვევები“ გაიხსნა ბათუმის შოთა რუსთაველის სახელმწიფო უნივერსიტეტში. ორდღიანი კონფერენციის მიზანია მარკეტინგის ინოვაციურ პროცესებში არსებული აქტუალური ტრენდების კომპლექსური ანალიზი მსოფლიო ეკონომიკის თანამედროვე პირობებში და მათი პრაქტიკული დანერგვის ხელშეწყობა. „გლობალური მარკეტინგი: თანამედროვეობის ანალიზი და გამოწვევები“ ბათუმის შოთა რუსთაველის სახელმწიფო უნივერსიტეტის, ეკონომიკური კვლევების ეროვნული ინსტიტუტის და უკრაინის ეროვნული საავიაციო უნივერსიტეტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასოცირებულმა პროფესორმა ბესიკ ბაუჩაძემ 15-17 მაისს მონაწილეობა მიიღო პოლტავის იური კონდრატიუკის სახელობის ეროვნული ტექნიკური უნივერსიტეტის ორგანიზებით გამართულ საერთაშორისო კონფერენციაში „სახელმწიფოს ეკონომიკური განვითარება და სოციალური სტაბილურობა“, სადაც წარადგინა მოხსენება თემაზე: „ესტონური მოდელი და საგადასახადო რისკები“. ასოცირებულმა პროფესორმა ბესიკ ბაუჩაძემ ასევე მონაწილეობა მიიღო 21-24 მაისს, ამავე უნივერსიტეტის მიერ ორგანიზებულ საერთაშორისო სამეცნიერო კონფერენციის „BUILDING INNOVATIONS – 2019“ პლენარულ და სექციურ მუშაობაში. კონფერენციაში ჩართული იყო სამი ქვეყნის 100-ზე მეტი წარმომადგენელი.

ერაზმუს+-ის აკადემიური პერსონალის გაცვლითი პროგრამის ფარგლებში ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებისათვის პოლონეთის კვიძინის უნივერსიტეტის პროფესორმა ტომაშ პრზლეჩლევსკიმ და ვიტაუს მაგნუს უნივერსიტეტის ბიოეკონომიკის განვითარების ფაკულტეტის დეკანმა, პროფესორმა ასტრიდა მიცეიკიენიამ საჯარო ლექციები წაიკითხეს. პროფესორმა ტომაშ პრზლეჩლევსკმა ლექციაზე მოხსენება - „ხარისხის სტატისტიკური სქემები: შესავალი მონაცემთა ვიზუალიზაციაში“ წარადგინა, ხოლო პროფესორმა ასტრიდა მიცეიკიენიამ ნაშრომი - „ფინანსისტის პროფესიაში ცვლილებები დიგიტალიზაციის კონტექსტში“ გააცნო ახალგაზრდებს.

9-15 მაისს ბათუმის შოთა რუსთაველის სახელმწიფო უნივერსიტეტის რექტორის მოადგილემ, პროფესორმა ნათია წიკლაშვილმა, ეკონომიკის და ბიზნესის და ტურიზმის ფაკულტეტის აკადემიურმა პირებმა ასოცირებულმა პროფესორებმა: ბადრი გეჩბაიამ და ეკატერინე ბახტაძემ, ასისტენტ პროფესორებმა: ირინე თავაძემ, ირინე ვაშაყმაძემ, ლილით მელოიან-ფუტკარაძემ, ნატალია ჯაბნიძემ, ნატალია რობიტაშვილმა, ნარგიზ ფალავანდიშვილმა, მოწვეულმა მასწავლებლებმა: ლალი ანდღულაძემ და ქეთევან გოლეთიანმა მონაწილეობა მიიღეს ხორვატიაში, ქალაქ პორეჩში გამართულ მე-2 საერთაშორისო სამეცნიერო ფორუმში „ერთიანი საგანმანათლებლო სივრცე: უკრაინა-ევროკავშირი.“ ფორუმის ფარგლებში ბათუმის შოთა რუსთაველის სახელმწიფო უნივერსიტეტსა და ხორვატიის სახელმწიფო ფისკალური სამსახურის ფინანსების და საბანკო საქმის უნივერსიტეტს შორის ურთიერთთანამშრომლობის მემორანდუმი გაფორმდა. კონფერენცია ზაგრების ეკონომიკისა და მენეჯმენტის უმაღლესი სკოლის ორგანიზებით გაიმართა. კონფერენციის მასალები გამოქვეყნდა საერთაშორისო რეფერირებად, რეცენზირებად ჟურნალში „Fundamental and applied research in practice of leading scientific schools“, რაც ხელს შეუწყობს ბსუ-ს თანამშრომლების ცნობადობის გაზრდას საერთაშორისო სამეცნიერო საზოგადოებაში.

დასრულდა ბათუმის შოთა რუსთაველის სახელმწიფო უნივერსიტეტის საფაკულტეტო და საუნივერსიტეტო სახელობითი სტიპენდიების კონკურსი. პროფესორ ვახტანგ პაპუნიძის სახელობის სტიპენდია ლევან ცეცხლაძეს (მაგისტრატურა, სპეციალობა - ფინანსები და საბანკო საქმე, მეორე კურსი) მიენიჭა, პროფესორ ვალერიან მელქაძის სახელობის სტიპენდია - მზია სურმანიძემ (ბაკალავრიატი, სპეციალობა - ფინანსები, მეოთხე კურსი) მოიპოვა, ხოლო ხუსეინ ნაკაიძის სახელობის საუნივერსიტეტო სტიპენდია - ნესტან ვარშანიძეს (ბაკალავრიატი, სპეციალობა- ეკონომიკა, მესამე კურსი) ხვდა წილად. ეკონომიკისა და ბიზნესის ფაკულტეტის ადმინისტრაცია და პროფესორ-მასწავლებლები სტიპენდიატებს ულოცავენ წარმატებებს.