ეკონომიკისა და ბიზნესის ფაკულტეტის სტუდენტები სასწავლებლად ერაზმუს+-ის საერთაშორისო გაცვლითი პროგრამის ფარგლებში, ბულგარეთსა და საბერძნეთში გაემგზავრნენ. ეკონომიკის სადოქტორო საგანმანათლებლო პროგრამის მესამე სასწავლო წლის სტუდენტი თამარ ფოლადაშვილი 2017-2018 სასწავლო წლის გაზაფხულის სემესტრში ცენოვის ეკონომიკის აკადემიაში ისწავლის, ხოლო ფინანსების საბაკალავრო საგანმანათლებლო პროგრამის მესამე სასწავლო წლის სტუდენტი ლინდა მამულაძე - კრეტას ტექნოლოგიურ უნივერსიტეტში.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სტუდენტმა ნანა წოწონავამ და ეკონომიკისა და ბიზნესის ფაკულტეტის სტუდენტმა ელიზაბეტ ფალავანდიშვილმა მონაწილეობა მიიღეს 1-4 მარტს, თურქეთის რესპუბლიკის ქალაქ ბურსაში გამართულ ევროპის საერთაშორისო ტურნირში - „თოვლის ფრენბურთი“. ბსუ-ს სტუდენტებმა ტურნირში წელს მეორედ იასპარეზეს და წარმატებული გამოსვლების შედეგად კიდევ უფრო გაიუმჯობესეს რეიტინგული ქულები.

ბათუმის შოთა რუსთაველის სახელმწიფო უნივერისტეტში აჭარის ავტონომიური რესპუბლიკის უმაღლესი საბჭოს თავმჯდომარე და საორგანიზაციო კომისიის წარმომადგენლები იურიდიული, სოციალურ და პოლიტიკურ მეცნიერებათა, ეკონომიკისა და ბიზნესის ფაკულტეტების სტუდენტებს შეხვდნენ.

„აჭარის ავტონომიური რესპუბლიკის კონსტიტუციაში ცვლილების შეტანის შესახებ“ აჭარის ავტონომიური რესპუბლიკის კონსტიტუციური კანონის პროექტის გამოქვეყნებისა და მისი საჯარო განხილვის საორგანიზაციო კომისიის თავმჯდომარემ დავით გაბაიძემ სტუდენტებს კანონის პროექტით გათვალისწინებული ცვლილებები გააცნო.

შეხვედრა დისკუსიის რეჟიმში გაიმართა, სადაც სტუდენტებმა საკონსტიტუციო ცვლილებების განხილვის პროცესში აქტიური მონაწილეობა მიიღეს.

ილიას სახელმწიფო უნივერსიტეტის პროფესორებმა გიგი თევზაძემ და გიორგი გახელაძემ ტრენინგი ჩაუტარეს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორ-მასწავლებლებს. სწავლება ტრენერების მიერ მომზადებული სპეციალური პროგრამის - RESULT (Reserch and Education Systems Unified as Learning Tools) მიხედვით. ფაკულტეტის აკადემიური პერსონალი ერთდღიანი ტრენინგის ფარგლებში სწავლების თანამედროვე მეთოდებს გაეცნენ.

დასრულდა საუნივერსიტეტო და საფაკულტეტო სახელობითი სტიპენდიების კონკურსი. ხუსეინ ნაკაიძის სახელობის საუნივერსიტეტო სტიპენდია ეკონომიკისა და ბიზნესის ფაკულტეტის მესამე კურსის სტუდენტმა ნესტან ვარშანიძემ მოიპოვა. ვახტანგ პაპუნიძის სახელობის სტიპენდია დავით ფარტენაძეს (მაგისტრატურა, მეორე კურსი) მიენიჭა, ვალერიან მელქაძის სახელობის სტიპენდია - ტარიელ ქოჩაკიძეს (ბაკალვრიატი, მესამე კურსი), ხოლო გივი გამსახურდიას სახელობის სტიპენდია - ხათუნა თურმანიძეს (ბაკალავრიატი, მესამე კურსი). ბათუმის მერიის მიერ გამოცხადებულ ლუკა ასათიანის სახელობის სტიპენდიანტებად ეკონომიკისა და ბიზნესის ფაკულტეტის სტუდენტები ქსენია ბედია და ნინო მაჭარაშვილი დასახელდნენ.