ბათუმის შოთა რუსთაველის სახელობის სახელმწიფო უნივერსიტეტში ააიპ შეზღუდული შესაძლებლობის მქონე პირთა უფლებებისათვის პროექტის „ბათუმის ახალგაზრდული მერიის“ ეგიდით შეხვედრა გაიმართა თემაზე: „ქალთა უფლებები და მედის როლი“. სტუდენტებმა და პროექტის მონაწილეებმა გენდერის მედია ცენტრის ხელმძღვანელ თამილა დოლიძესთან ერთად გენდერთან დაკავშირებულ აქტუალურ საკითხებზე, გენდერულ თანასწორობასა და მედია უფლებებზე იმსჯელეს. შეხვედრა ბაათუმის ახალგაზრდული მერიის ტრეინგ- სემინარების ფარგლებში ეკონომიკისა და ბიზნესის ფაკულტეტის მხარდაჭერით ჩატარდა.

ტემპუსის საგრანტო პროექტის „ინტერნაციონალიზაციითვის ხელშეწყობა უმაღლეს სასწავლო დაწესებულებებში მეზობელ აღმოსავლეთის ქვეყნებში, კულტურული და სტრუქტურული ცვლილებების გზით“ (”Promoting Internationalization of HEIs in Eastern Neighbourhood Countries through Cultural and Structural Adaptations (PICASA)“ ფარგლებში ერევნის სახელმწიფო უნივერსიტეტში ჩატარდა სემინარი და კონფერენცია. პროექტის კოორდინატორი, ეკონომიკისა და ბიზნესის ფაკულტეტის ასისტენტ პროფესორი ლილით მელოიან-ფუტკარაძე, ფაკულტეტის ხარისხის სამსახურის უფროსი პროფესორი ასიე ცინცაძე, ბსუ-ს რექტორის მოადგილე სამეცნიერო დარგში, პროფესორი ნათელა წიკლაშვილი და ასისტენტ პროფესორი ნოდარ ფუტკარაძე ხუთი დღის განმავლობაში უცხოელ კოლეგებთან ერთად საგანმანათლებლო პროგრამების ინტერნაციონალიზაციის საკითხზე მუშაობდნენ.

აკაკი წერეთლის სახელმწიფო უნივერსიტეტში გამართულ საერთაშორისო სამეცნიერო-პრაქტიკულ კონფერენციაში „თანამედროვე განვითარების ეკონომიკური, სამართლებრივი და სოციალური პრობლემები - 2015“ მონაწილეობა მიიღეს ეკონომიკისა და ბიზნესის ფაკულტეტის პროფესორ-მასწავლებლებმა. ფინანსების და საბანკო საქმის დეპარტამენტის პროფესორმა ასიე ცინცაძემ, ასოცირებულმა პროფესორმა გიორგი აბუსელიძემ, ასოცირებულმა პროფესორმა ლელა ონიანმა, ასისტენტ-პროფესორმა ლილით მელოიან-ფუტკარაძემ, დოქტორანტებმა თამარ ღოღობერიძემ და ლაშა ბერიძემ საერთაშორისო სამეცნიერო სესიებსა და ვორკშოფებში მოხსენებები წარადგინეს ეკონომიკის აქტუალურ საკითხებზე. კონფერენციის დასასრულს დაიგეგმა ბათუმის შოთა რუსთაველის სახელმწიფო უნივერსიტეტისა და აკაკი წერეთლის სახელმწიფო უნივერსიტეტის ერთობლივი პროექტების განხორციელება. სამეცნიერო-პრაქტიკული სესია საქართველოს განათლებისა და მეცნიერების სამინისტროს ორგანიზებით მეცნიერებისა და ინოვაციების საერთაშორისო კვირეულის ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებს სახელობითი სტიპენდიები დაენიშნათ. მაგისტრატურის ფინანსები და საბანკო საქმის II კურსის სტუდენტი გიორგი სურმანიძე პროფესორ გივი გამსახურდიას სახელობის სტიპენდიანტია. მაგისტრატურის ბიზნესის ადმინისტრირების II კურსის სტუდენტმა მარიამ მსხალაძემ პროფესორ ვალერიან მელქაძის სახელობითი სტიპენდია მიიღო, საბურალტრო და საგადასახადო საქმის IV კურსის სტუდენტმა მარინა ბერაძემ პროფესორ ვახტანგ პაპუნიძის სახელობითი სტიპენდია, ხოლო ფინანსების სპეციალობის IV კურსის სტუდენტ მელანო აბაშიძესა და მენეჯმენტის სპეციალობის IV კურსის სტუდენტ გიორგი ზოსიძეს ავთანდილ ბარათაშვილის სახელობითი სტიპენდია დაენიშნათ. უნივერსიტეტი ულოცავს სტიპენდიანტებს გამარჯვებას და უსურვებს წარმატებებს.

ევროკავშირის Tempus-ის პროექტის: “ინტერნაციონალიზაციითვის ხელშეწყობა უმაღლეს სასწავლო დაწესებულებებში მეზობელ აღმოსავლეთის ქვეყნებში, კულტურული და სტრუქტურული ცვლილებების გზით PICASA“ ფარგლებში, ბათუმის შოთა რუსთაველის სახელმწიფო უნივერსიტეტში სემინარი ჩატარდა. ეკონომიკისა და ბიზნესის ფაკულტეტის პროფესორ-მასწავლებლებისაგან დაკომპლექტებულმა პროექტის სამუშაო ჯგუფმა უმაღლესი საგანმანათლებლო დაწესებულების პროფესორ-მასწავლებლებს უნივერსიტეტში ინტერნაციონალიზაციის ელემენტების განვითარების, კურიკულუმის, სტუდენტთა გაცვლისა და საზღვარგარეთის უნივერსიტეტებთნ თანამშრომლობის ამოქმედების საკითხები გააცნო. საერთაშორისო პროექტის მიზანია ხელი შეუწყოს ინტერ-კულტურულ და საერთაშორისო პერსპექტივებს, ინიციატივებს და მათი ხარისხის უზრუნველყოფას.