2016 წლის 19 იანვარს ეკონომიკისა და ბიზნესის ფაკულტეტის „მენეჯმენტის“ სპეციალობის (minor) IV კურსის სტუდენტებმა: თინათინ შავლიძემ, ლელა ფაღავამ, მარიკა ზოსიძემ, თამარ კაკაბაძემ და სოფიკო ბერიძემ შეიმუშავეს და განახორციელეს სოციალური პროექტი - „არა პოლიეთილენის პარკებს“. პროექტი მიზნად ისახავდა საზოგადოების ინფორმირებას გარემოს დაბინძურებით გამოწვეულ პრობლემებსა და მოსწავლეების ჩართულობის გაზრდას პრობლემის გადასაჭრელად. სოციალური პროექტი სასწავლო კურსის - „პროექტების მართვის“ ფარგლებში შემუშავდა და სტუდენტთა პრაქტიკული უნარ-ჩვევების გამომუშავებას ემსახურებოდა.

ეკონომიკისა და ბიზნესის ფაკულტეტის სტუდენტებს კონკურსი ჩაუტარდათ ბანკ "რესპუბლიკაში" ბიზნეს სესხების საკრედიტო ოფიცრის ვაკანტური ადგილების დასაკავებლად. კონკურსი ეკონომიკისა და ბიზნესის ფაკულტეტსა და ბანკ "რესპუბლიკას" შორის გაფორმებული ურთიერთთანამშრომლობის მემორანდუმის ფარგლებში ჩატარდა .

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებმა უმაღლესი საგანმანათლებლო დაწესებულების ეზოში სასწავლო კურსის „ბიზნეს გეგმის მენეჯმენტის“ ფარგლებში გამოფენა-გაყიდვა გამართეს. ღონისძიებაზე წარმოდგენილი იყო ჯგუფ „ფერადი კრეატივის“ წევრების მიერ დამზადებული ნივთები. ახალგაზრდები მომავალშიც განახორციელებენ მსგავსი ტიპის პროექტებს.

ბათუმის შოთა რუსთაველის სახელმწიფო უნივერსიტეტში ტექნოლოგიური ფაკულტეტის ბაზაზე გახსნილი სამრეწველო ინოვაციების ლაბორატორია დაათვალიერეს ეკონომიკისა და ბიზნესის ფაკულტეტის მარკეტინგის სპეციალობის მესამე კურსის სტუდენტებმა. სამრეწველო ინოვაციების ლაბორატორიაში ნებისმიერ სტუდენტს საშუალება ექნება პრაქტიკულ ცოდნის მიღებასთან ერთად გაეცნოს თანამედროვე ტექნოლოგიურ მიღწევებს. როგორც ცნობილია, ლაბორატორია აღჭურვილია ულტრა თანამედროვე აპარატურით. კერძოდ, ფაბლაბში დამონტაჟებულია 3D პრინტერები, ლაზერული მჭრელი და სხვა პროგრამირებადი დაზგა-დანადგარები. სტუდენტებმა დაათვალიერეს ლაბორატორია და პრაქტიკულად გაეცნენ აღნიშნული აპარატურით სხვადასხვა დეტალის დამზადების ტექნოლოგიებს.

აჭარის ა.რ. ეკონომიკისა და ფინანსთა მინისტრი დავით ბალაძე ბათუმის შოთა რუსთველის სახელმწიფო უნივერსიტეტის რექტორის მოვალეობის შემსრულებელს მერაბ ხალვაშს, ეკონომიკისა და ბიზნესის ფაკულტეტის სტუდენტებსა და პროფესორ-მასწავლებლებს შეხვდა. უწყების პირველმა პირმა მომავალ ეკონომისტებს სამინისტროს პროექტები და სამომავლო პერსპექტივები გააცნო. ბათუმში საქართველოს ფინანსთა სამინისტროს აკადემიის ფილიალის ბაზაზე შეიქმნება გადამზადების პროგრამა, სადაც ეკონომიკის მიმართულებისა და სხვადასხვა სპეციალობის სტუდენტები საჯარო სექტორში დასაქმებისათვის საჭირო თეორიულ და პრაქტიკულ კურსს გაივლიან. შეხვედრის ფარგლებში ეკონომიკისა და ბიზნესის ფაკულტეტის დეკანმა ვლადიმერ ღლონტმა და აჭარის ა.რ. ეკონომიკისა და ფინანსთა მინისტრმა დავით ბალაძემ თანამშრომლობის მემორანდუმს მოაწერეს ხელი.