ბათუმის შოთა რუსთაველის სახელმწიფო უნივერსიტეტის ბაზაზე სამედიცინო კორპორაცია „ევექსის“ ორგანიზებითა და უმაღლესი საგანმანათლებლო დაწესებულების მხარდაჭერით სასწავლო ცენტრი გაიხსნა. სამედიცინო განათლებისა და მედიკოსთა პროფესიული განვითარების ცენტრი სწავლების თანამედროვე მეთოდებით, თეორიული ლექცია–სემინარებისა და პრაქტიკული მეცადინეობის გზით უზრუნველყოფს სტუდენტებისა და სამედიცინო პერსონალის პრაქტიკულ უნარ-ჩვევებზე დაფუძნებულ სწავლებას, უწყვეტ სამედიცინო განათლებასა და კვალიფიკაციის ამაღლებას. საერთაშორისო პროფესიულ ასოციაციებსა და ორგანიზაციებთან თანამშრომლობის ფარგლებში, სასწავლო ცენტრში ტრენინგებს ჩაატარებენ გამოცდილი ქართველი და უცხოელი ექსპერტები. სწავლება დაეხმარება აჭარის სამედიცინო პერსონალს მსოფლიო მედიცინის უახლესი მიღწევების გაცნობაში.

შავი ზღვის დაცვის დღე ბათუმის შოთა რუსთაველის სახელმწიფო უნივერსიტეტში ვორქშოფით - „ჩვენი შავი ზღვა“ აღინიშნა. საბუნებისმეტყველო მეცნიერებათა და ჯანდაცვის ფაკულტეტის ორგანიზებით გამართულ სემინარზე სტუდენტებმა მოხსენებები წარმოადგინეს შავი ზღვის დაცვის აქტუალურ საკითხებზე. ვორქშოფის მონაწილეებმა იმსჯელეს ისეთ მნიშვნელოვან თემებზე, როგორიცაა: „შავი ზღვის ეკოლოგიური პრობლემები“, „შავი ზღვა - პრობლემები, მიზეზები, შედეგები“, „ნავთობი და შავი ზღვა“, „წყალარინების მდგომარეობა აჭარაში“, „მდინარე დუნაის გავლენა შავი ზღვის დაბინძურებაზე“ და „ურბანიზაციის პროცესების გავლენა აჭარაში ეკოტურიზმის განვითარებაზე“. ღონისძიება ბათუმის დელფინარიუმსა და აკვარიუმში გაგრძელდა. ბათუმის შავი ზღვის ფლორისა და ფაუნის სამეცნიერო-კვლევითი ცენტრის წარმომადგენლებმა: ტარიელ წეროძემ, ქეთევან გერაძემ და მზია ბურჭულაძემ სტუდენტებს ზღვის ძუძუმწოვრებისა და თევზების მრავალგვარობა გააცნეს. ასევე ისაუბრეს ზღვის ცხოველთა ბიოლოგიაზე, ქცევის თავისებურებებზე, ეკოლოგიური სტატუსსა და მათი დაცვის აუცილებლობაზე.

ბათუმის შოთა რუსთაველის სახელმწიფო უნივერსიტეტში დაავადებათა კონტროლისა დასაზოგადოებრივი ჯანმრთელობის ეროვნული ცენტრის გენერალური დირექტორის მოადგილემ, პაატა იმნაძემ საჯარო ლექცია წაიკითხა თემაზე: „ჰემორაგიული ცხელებებით მიმდინარე დაავადებები“. საბუნებისმეტყველო მეცნიერებათა და ჯანდაცვის ფაკულტეტის სტუდენტები და პროფესორ-მასწავლებლები ინფექციის გადაცემის გზებს, მკურნალობის, პრევენციის და კონტროლის საკითხებს, პერსონალური დამცავ საშუალებებასა და ხელსაწყოების (PPE) სწორად გამოყენების წესებს გაეცნენ. ლექციაზე ყურადღება იყო გამახვილებული ებოლას ვირუსზე, ყირიმ კონგოს ჰემორაგიული ცხელებასა და სხვა აქტუალურ საკითხებზე.

საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის სტუდენტებმა და პროფესორ-მასწავლებლებმა ხის დარგვის საერთაშორისო დღე აღნიშნეს. ასოცირებულმა პროფესორმა ნათელა ვარშანიძემ, ასისტენტ პროფესორმა ინგა დიასამიძემ და სტუდენტებმა ქობულეთში სოფელ თიკერში ფიჭვის, ნაძვის ნერგები დარგეს და სანერგე მეურნეობაში საქართველოს წითელ ნუსხაში შეტანილი ართვინის მუხის თესლი დათესეს. ღონისძიებაში სტუდენტებთან ერთად, გარემოს დაცვისა და ბუნებრივი რესურსების სამმართველოს წარმომადგენლები, აჭარის სატყეო სააგენტოს თანამშრომლები და 14 საჯარო სკოლის მოსწავლეები მონაწილეობდნენ.

ჰოსპისისა და პალიატიური მზრუნველობის საერთაშორისო დღისადმი მიძღვნილი საუნივერსიტეტო სტუდენტური სამეცნიერო-პრაქტიკული კონფერენცია და პოსტერების წარდგინება ჩატარდა უნივერსიტეტში. საქართველოს ექიმთა ასოციაციის თავმჯდომარემ გიორგი ლობჟანიძემ და თსუ-ს პროფესორმა, პალიატიური მზრუნველობის საქართველოს ეროვნული ასოციაციის თავმჯდომარემ დიმიტრი კორძაიამ სესიაზე მოხსენებები წარმოადგინეს დარგის აქტუალურ საკითხებზე. ღონისძიებების ფარგლებში ბათუმის შოთა რუსთაველის სახელმწიფო უნივერსიტეტისა და ივანე ჯავახიშვილის თბილისის სახელმწიფო უნივერსიტეტის სტუდენტები არსებულ სიახლეებს გაეცნენ და პალიატიური მზრუნველობის პაციენტები მოინახულეს.