ვროცლავის ეკონომიკისა და ბიზნესის უნივერსიტეტი ბსუ-ს ეკონომიისა და ბიზნესის ფაკულტეტის სტუდენტებს სთავაზობს საზაფხულო სკოლაში მონაწილეობას. საზაფხულო სკოლა 28 ივნისიდან 7 ივლისამდე გაიმართება ვროცლავში, პოლონეთში. საზაფხულო სკოლა მოიცავს 86 საკონტაქტო საათს ყოველდღიური შეხვედრების ფორმით, ლექციებს ვორქშოპებს, ბიზნეს სიმულაციურ თამაშებს და სხვა. სტუდენტებს შესაძლებლობა აქვთ მოიპოვონ 6 კრედიტი. პროგრამის ფარგლებში დაგეგმილია კულტურული და სოციალური აქტივობები.

8 ივნისს, 13:00 საათზე, ბათუმის შოთა რუსთველის სახელმწიფო უნივერსიტეტში, 423-ე აუდიტორიაში ბსუ-ს ეკონომიკისა და ბიზნესის ფაკულტეტის ასოცირებული პროფესორი ბესიკ ბოლქვაძე ჩაატარებს საჯარო ლექციას თემაზე: „საინვესტიციო პოლიტიკა საქართველოში (პრაქტიკის პრიზმით დანახული რეალობა)’’. ლექციაში განხილული იქნება: სახელმწიფოს საინვესტიციო პოლიტიკის ტრენდები; საინვესტიციო სტატისტიკის, საინვესტიციო მარკეტინგისა და საინვესტიციო ციკლის მართვის თავისებურებები; სახელმწიფოსა და ინვესტორს შორის ურთიერთობის ცალკეული ასპექტები; სახელმწიფო-კერძო პარტნიორობის საინვესტიციო მოდელები; ინვესტორთა „პორტრეტი’’ და სხვა აქტუალური საკითხები. საჯარო ლექციაზე დასწრება თავისუფალია.

აჭარის უმაღლესი საბჭოს თავმჯდომარის მოადგილე ტიტე აროშიძე ბსუ-ს ეკონომიკისა და ბიზნესის ფაკულტეტის სტუდენტებს შეხვდა. „დეპუტატის საათის“ ფორმატში გამართულ შეხვედრაზე ტიტე აროშიძემ ისაუბრა ქვეყნისა და რეგიონის მასშტაბით ბიუჯეტის ფორმირების, საბიუჯეტო მოწყობისა და პროცედურების საკითხებზე, ასევე ყურადღება გაამახვილა აჭარის საკანონმდებლო ორგანოში ამ მიმართულებით მიმდინარე პროცესებზე, საკანონმდებლო საქმიანობაში მოქალაქეთა ჩართულობის ხელშემწყობ სერვისებსა და სიახლეებზე. ტიტე აროშიძემ ახალგაზრდებს წარუდგინა ვებპლატფორმა chaerte.sca.ge. ახალი ონლაინპლატფორმა მოქალაქეებს შესაძლებლობას აძლევს, სახლიდან გაუსვლელად ჩანიშნონ შეხვედრები უმაღლესი საბჭოს წევრებთან, გამოთქვან საკუთარი მოსაზრებები ამა თუ იმ კანონის პროექტზე, შეიტანონ პეტიცია და დაესწრონ სხდომას.

„Lixin Group“-ის წარმომადგენლებმა ბათუმის შოთა რუსთველის სახელმწიფო სტუდენტებისათვის საინფორმაციო შეხვედრა გამართეს. შეხვედრაზე ახალგაზრდები გაეცნენ „ბათუმის ფესტივალის“, „Night Market”-ში დასაქმებასთან დაკავშირებულ საკითხებს. „ბათუმის ფესტივალის” დაარსების მიზანია საერთაშორისო ღირსშესანიშნაობების „Night Market”-ის ორგანიზება. პროექტი ითვალისწინებს ტურისტის მოზიდვასა და „Night Market”-ის, როგორც საქართველოს ყველაზე პოპულარული კულტურული ტურისტული ადგილის, პოზიციონირებას.

საქართველოს ბანკის წარმომადგენლები ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებს შეხვდნენ. ადამიანური რესურსების წარმომადგენელმა ნათია კელაპტრიშვილმა და აჭარის ა.რ. რეგიონი მენეჯერის მოადგილემ ილონა დოლიძემ ახალგაზრდებს გააცნეს საქართველოს ბანკის შესახებ ინფორმაცია, ასევე ესაუბრნენ აქტიური ვაკანსიების, დასაქმებისა და კარიერული განვითარების შესაძლებლობების შესახებ. შეხვედრა დისკუსიის რეჟიმში გაგრძელდა და საქართველოს ბანკის თანამშრომლებმა სტუდენტების შეკითხვებს უპასუხეს.