ბათუმის შოთა რუსთაველის სახელმწიფო უნივერსიტეტი მასპინძლობს „ერაზმუს+“-ის ინსტიტუციური განვითარების პროექტის „აკადემიური კეთილსინდისიერება ხარისხიანი სწავლისა და სწავლებისათვის ქართულ უმაღლეს საგანმანათლებო დაწესებულებებში“ კონსორციუმის მესამე საერთაშორისო შეხვედრას. პროექტის მიზანია, საქართველოს უმაღლეს საგანმანათლებლო დაწესებულებებში სწავლა-სწავლებისა და შეფასების ხარისხის განვითარება აკადემიური კეთილსინდისიერების პრინციპების დაცვით. პროგრამა ითვალისწინებს პლაგიატის შემთხვევების გამოვლენის, პრევენციისა და აღმოფხვრის ხელშემწყობი პოლიტიკისა და მექანიზმების შემუშავებას.

ბათუმის შოთა რუსთაველის სახელმწიფო უნივერსიტეტში 2020 წლის 15 იანვრიდან ამოქმედდა ERASMUS+–ის სამწლიანი საგრანტო პროექტი „სწავლების ოპტიმიზაცია და აკადემიური ინკლუზია დისტანციური სწავლებისა და სწავლის გამოყენებით" (Learning Optimization and Academic Inclusion Via Equitative Distance Teaching and Learning - Love Distance). პროექტი ითვალისწინებს ეთნიკური უმცირესობების, არახელსაყრელ პირობებსა და პერიფერიულ ადგილებში მყოფი ქალებისა და შეზღუდული შესაძლებლობის მქონე სტუდენტებისთვის ინკლუზიური უმაღლესი განათლების წვდომასა და ხარისხის გაუმჯობესებას ისრაელსა და საქართველოში. პროექტის კოორდინატორია პორტოს პოლიტექნიკური ინსტიტუტი (IPP), საქართველოდან კი პროექტში ბსუ-სთან ერთად, ჩართულია ილიას სახელმწიფო უნივერსიტეტი და იაკობ გოგებაშვილის სახელობის თელავის სახელმწიფო უნივერსიტეტი.

ბათუმის შოთა რუსთაველის სახელმწიფო უნივერსიტეტის დაწყებითი განათლების საბაკალავრო საგანმანათლებლო პროგრამის მეოთხე კურსისა და ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო საგანმანათლებლო პროგრამის მეორე კურსის სტუდენტების მონაწილეობით მხიარული სტარტები ჩატარდა. სტუდენტები სხვადასხვა სახის ფიზიკურ აქტივობაში შეეჯიბრნენ ერთმანეთს. შედეგი ფრედ დამთავრდა. ღონისძიება ზუსტ მეცნიერებათა და განათლების ფაკულტეტის ხელშეწყობითა და კურსის კურატორების ორგანიზებითა გაიმართა.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის კომპიუტერულ მეცნიერებათა და მათემატიკის დეპარტამენტებისა და საქართველოს ტექნიკური უნივერსიტეტის ნიკო მუსხე¬ლიშვილის სახელობის გამოთვლითი მათემატიკის ინსტიტუტის ორგანიზებით ჩატარდა სამეცნიერო სემინარი თემაზე: „კომპიუტერული მოდელირების მათემატიკური საფუძვლები“. პროფესორმა ჰამლეტ მელაძემ, ასისტენტ პროფესორმა ელზა ჯინჭარაძემ და დოქტორანტმა ზურაბ მესხიძემ სტუდენტებსა და პროფესორ-მასწავლებლებს დარგის აქტუალური საკითხები გააცნეს.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის სტუდენტებმა და პროფესორ-მასწავლებლებმა სკოლის მოსწავლეებთან ერთად პროექტის „დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ ბრძოლა საქართველოში" ფარგლებში დაიწყო კამპანია „მე ვირჩევ თანასწორობას“. კამპანიის ფარგლებში ბათუმის მე-15 საჯარო სკოლაში გაიმართა აღმზრდელობითი ღონისძიება „ჩვენ დავიბადეთ თანასწორნი და განსხვავებულნი“. შეხვედრაში თანაბრად მონაწილეობდნენ ტიპური განვითარების სტუდენტები, სკოლის მოსწავლეები და შეზღუდული შესაძლებლობების მქონე პირები. ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის დაწყებითი განათლების სპეციალობის და მასწავლებლის მომზადების საგანმანათლებლო პროგრამის სტუდენტებმა, მე-2, მე-15 და 26-ე საჯარო სკოლის ინკლუზიური სწავლების ცენტრის მოსწავლეებმა წარადგინეს მოხსენებები გენდერულ, სოციალურ, რელიგიურ თანასწორობასა და რასობრივ დისკრიმინაციაზე, ჩაატარეს სხვადასხვა სახის კულტურულ-შემეცნებითი აქტივობები, ასევე, გაიმართა შეზღუდული შესაძლებლობების მქონე პირების ნამუშევრების გამოფენა. ღონისძიებას ესწრებოდნენ აჭარის ჯანმრთელობისა და სოციალური დაცვის სამინისტროს, ბათუმის რესურსცენტრისა და არასამთავრობო ორგანიზაციების წარმომადგენლები.
პროექტი მიზნად ისახავს მოზარდ თაობაში საზოგადოებრივი ცნობიერების გაზრდას, დისკრიმინაციისა და სიძულვილის ენის გავრცელების პრევენციის გზების დასახვას, თანასწორობისა და ტოლერანტობის, ადამიანის უფლებათა დაცვის კულტურის განვითარება-დამკვიდრებას. პროექტი ხორციელდება ევროსაბჭოს მხარდაჭერით.