ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ორგანიზებით, სკოლისა და უნივერსიტეტის თანამშრომლობის კლუბის „სკოლა-უნივერსიტეტი“ ფარგლებში, მეათე სამეცნიერო კონფერენცია გაიმართა თემაზე: „სასკოლო განათლება - თანამედროვე გამოწვევები და პერსპექტივები“. კონფერენციაში უნივერსიტეტებისა და ზოგადსაგანმანათლებლო დაწესებულებების 300-ზე მეტი სტუდენტი და მოსწავლე მონაწილეობდა. სესია გახსნეს, მონაწილეებს მიესალმნენ ბსუ-ს რექტორი მერაბ ხალვაში, ზუსტ მეცნიერებათა და განათლების ფაკულტეტის დეკანი ლელა თურმანიძე, აჭარის ა.რ. განათლების, კულტურისა და სპორტის სამინისტროს განათლების დეპარატამენტის უფროსი ნაზიბროლა ბერიძე-გაბაიძე და პროფესორ-მასწავლებლები.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის გეოგრაფიის მიმართულების აკადემიურმა პერსონალმა ცირა ქამადაძემ და ხათუნა ჭიჭილეიშვილმა სტუდენტებისთვის ჩაატარეს ტრენინგი თემაზე: „კლიმატის ცვლილებით გამოწვეული მეტეოროლოგიური ელემენტების ცვლილება და მათი ზემოქმედება გარემოზე“. ტრენინგი „ერაზმუს+“-ის პროექტის „საგანმანათლებლო, სამეცნიერო, მართვის და ინდუსტრიული კომპეტენციების ერთობლიობა კლიმატის მართვისა და კლიმატის ცვლილებების პრევენციისათვის (CLIMAN)“ ფარგლებში გაიმართა. პროექტის მენეჯერი, ზუსტ მეცნიერებათა და განათლების ფაკულტეტის დეკანი, პროფესორი ლელა თურმანიძე სტუდენტებს ესაუბრა პროექტის მნიშვნელობასა და მიზნებზე.

13-17 ნოემბერს, ავეიროს უნივერსიტეტში სასწავლო ვიზიტით იმყოფებოდნენ „ერაზმუს+“-ის საგრანტო პროექტის „პროფესიული განათლებისა და სტუდენტების ჩართულობის ხელშეწყობა მენტორინგისა და ტუტორინგის სისტემით უმაღლეს საგანმანათლებლო დაწესებულებებში" პერსონალი, პროექტის მენეჯერი, ზუსტ მეცნიერებათა და განათლების ფაკულტეტის დეკანი, პროფესორი ლელა თურმანიძე და მკვლევარი, მოწვეული მასწავლებელი, ტექნიკის მეცნიერებათა დოქტორი ელისო ძნელაძე. ვიზიტის ფარგლებში პროექტის მონაწილეები შეხვდნენ ავეიროს უნივერსიტეტის (UA) ვიცე-რექტორს, სანდრა სუარესს, საბუღალტრო აღრიცხვისა და ადმინისტრირების ინსტიტუტის (ISCA-UA) დეკანს, ფრანცისკო პიკადოს, საერთაშორისო ურთიერთობების ოფისის ხელმძღვანელს, სოფია ბრუკმანს და გაეცნენ ავეიროს უნივერსიტეტის ფაკულტეტებისა და სტრუქტურული ერთეულების საქმიანობას, უნივერსიტეტის ინტერნაციონალიზაციის პოლიტიკას.

5-13 ოქტომბერს ონლაინ ფორმატში და 29-30 ნოემბერს პირისპირ, ბათუმის შოთა რუსთაველის სახელმწიფო უნივერსიტეტში ზუსტ მეცნიერებათა და განათლების ფაკულტეტის პერსონალის და სამაგისტრო საგანმანათლებლო პროგრამის „პროფესიული და უწყვეტი განათლების“ სტუდენტებისთვის მაინცის უნივერსიტეტის პროფესორმა მარკუს ბონერმა ტრენინგები ჩაატარა. ტრენინგებზე მონაწილეები გაეცნენ სამაგისტრო ნაშრომების ფარგლებში საკვლევი პრობლემის შერჩევას, ნაშრომის შეფასებას, სამაგისტრო პროგრამის ფარგლებში პრაქტიკის კომპონენტის განხორციელებას, სწავლება-სწავლის მეთოდებსა და სხვა მნიშვნელოვან საკითხებს, რომლებიც ხელს უწყობენ სამაგისტრო საგანმანათლებლო პროგრამის „პროფესიული და უწყვეტი განათლება“ განვითარებას.

ბსუ-ს ზუსტ მეცნიერებათა და განათლების ფაკულტეტის ბავშვთა უფლებათა ცოდნის ცენტრში ბავშვთა საერთაშორისო დღისადმი მიძღვნილი დებატები გაიმართა თემაზე: „რა ვიცით ბავშვთა უფლებების შესახებ“. ღონისძიება მიზნად ისახავდა ბავშვის უფლებების ცენტრის ცნობადობის გაზრდასა და ცენტრის საქმიანობის მომავალი ხედვის შემუშავებაში სტუდენტებისა და მოსწავლეების მონაწილეობის ხელშეწყობას. დებატებში მონაწილეობა მიიღეს ბსუ-ს პროფესორ-მასწავლებლებმა, სტუდენტებმა, ბათუმის №3, № 6, №15 და კერძო სკოლა „იუჯის“ მოსწავლეებმა და მასწავლებლებმა. მონაწილეებს მიესალმა და ბავშვთა უფლებათა ცოდნის ცენტრის მუშაობის გამოცდილება გაუზიარა ბსუ-ს ზუსტ მეცნიერებათა და განათლების ფაკულტეტის დეკანმა, პროფესორმა ლელა თურმანიძემ.