საქართველოს ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს ანაზღაურებადი სტაჟირების პროგრამა წარუდგინეს. საქართველოს ენერგეტიკულ საწარმოებში ანაზღაურებად სტაჟირებას მაღალი აკადემიური მოსწრების მქონე სტუდენტები სამინისტროსთან გაფორმებული თანამშრომლობის მემორანდუმის ფარგლებში გაივლიან. პროგრამით სარგებლობა არა მხოლოდ ენერგეტიკული მიმართულების, არამედ სხვადასხვა ფაკულტეტის სტუდენტებს შეუძლიათ.

ბსუ-ს ეკონომიკისა და ბიზნესის ფაკულტეტის დეკანი, პროფესორი ნათია წიკლაშვილი 17-22 აპრილს მიწვეული იყო ლიეტუვაში, მიკოლას რომერის უნივერსიტეტში. შეხვედრები შედგა საზოგადოებრივი უსაფრთხოების აკადემიის დეკანთან პროფესორ სნიეგულე მატულნეს, დეკანის მოადგილე პროფესორ აურელია პურაიტესა და საერთაშორისო პროექტების მიმართულებით დეკანის თანაშემწე კატერინა პოლუპანოვასთან. ასევე შეხვედრა გაიმართა საჯარო მმართველობისა და ბიზნესის ფაკულტეტის დეკანის მოადგილესთან პროფსორ გიედრე ვალუნაიტე ოლეშკევიჩენესთან. შეხვედრაზე მხარეებმა განიხილეს გაცვლით პროგრამებში სტუდენტების უფრო აქტიურად ჩართვის, სტაჟირებისა და მკვლევრების ერთობლივი კვლევითი პროექტების მომზადების საკითხები. დაიგეგმა ერთობლივი პროგრამების მომზადებისთვის შემდგომი შეხვედრები.

ბსუ-ს ეკონომიკისა და ბიზნესის ფაკულტეტის პროფესორებმა 18-19 აპრილს მონაწილეობა მიიღეს ლიეტუვაში (ქ. ვილნიუსი, კაუნასი), მიკოლას რომერის უნივერსიტეტის საზოგადოებრივი უსაფრთხოების აკადემიის მიერ ორგანიზებულ ყოველწლიურ საერთაშორისო სამეცნიერო ფორუმის მუშაობაში. პროფესორმა ბადრი გეჩბაიამ (თანაავტორი ასისტენტ პროფესორი ქ.გოლეთიანი) მოხსენება წარადგინა თემაზე: „ადამიანური რესურსების როლი კომპანიის მდგრადი განვითარების მიზნების მისაღწევად“, ასისტენტ პროფესორმა გიორგი ქათამაძემ (თანაავტორი ასოცირებული პროფესორი ნატო ჯაბნიძე) მოხსენება წარადგინა თემაზე: მცირე და საშუალო ბიზნესის ბაზრის დივერსიფიკაციის თანამედროვე გამოწვევები.

ბსუ-ში ეკონომიკისა და ბიზნესის ფაკულტეტის ბიზნესის ადმინისტრირების კლასტერში წარმოდგენილი ახალი და მოქმედი სააკრედიტაციო პროგრამების წარდგენა გაიმართა. პრეზენტაციას ესწრებოდნენ აჭარის ა.რ. საკანონმდებლო და აღმასრულებელი ხელისუფლების, ქალაქ ბათუმის საკრებულოს წევრები, ცალკეულ საფინანსო-ეკონომიკური დეპარტამენტების, ქალაქ ბათუმის მერიის, ბიზნესის სექტორისა და არასამთავრობო ორგანიზაციის წარმომადგენლები, აჭარის ავტონომიური რესპუბლიკის სავაჭრო-სამრეწველო პალატის დირექტირი, ბიზნეს-ინკუბატორის ხელმძღვანელი, სხვადასხვა უმაღლესი საგანმანთლებლო დაწესებულების აკადემიური პერსონალი, ეკონომიკისა და ბიზნესის ფაკულტეტის საბაკალავრო, სამაგისტრო და სადოქტორო პროგრამების კურსდამთავრებულები.

ბათუმის შოთა რუსთაველის სახელმწიფო უნივერსიტეტის სტუდენტის, დავით გახოკიას საპროექტო გუნდთან ერთად შექმნილი სტარტაპ პროექტი “Foodly” GITA-ს 25000-ლარიანი გრანტის მფლობელი გახდა. Foodly-ი www.foodly.space რესტორნების რეზერვაციის მობილური აპლიკაციაა, რომელიც მომხმარებლებს შესაძლებლობას აძლევს, ერთ სივრცეში მარტივად აღმოაჩინონ და დაათვალიერონ სარესტორნო სივრცეები, დაჯავშნონ მაგიდა, შეუკვეთონ მენიუ და გადაიხადონ საფასური. ხოლო ბიზნესისთვის ეს არის შესაძლებლობა, მოიზიდონ დამატებითი მომხმარებლები ციფრულ სამყაროში გაზრდილი ხილვადობითა და მოქნილი რეზერვაციის პროცესის შეთავაზებით.