ბსუ-ს ეკონომიკისა და ბიზნესის ფაკულტეტის სტუდენტებმა: ნესტან ვარშანიძემ, გიორგი აბაშიძემ, ლაშა მამულაძემ და ბსუ-ს ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომელმა ირაკლი მიქელაძემ მონაწილეობა მიიღეს მწვანე ეკონომიკის ინოვაციების ფორუმში. ღონისძიების ფარგლებში გამართულ „მწვანე ეკონომიკის სკოლაში“ საქართველოს სხვადასხვა უნივერსიტეტის სტუდენტებმა და სატყეო სექტორის დაინტერესებულმა მხარეებმა ტყის რესურსებით მდგრად სარგებლობაზე დაფუძნებული ბიზნესგეგმები წარმოადგინეს. სტუდენტების მიერ მომზადებული კონცეფციებიდან ოთხი ყველაზე პერსპექტიული შეირჩა შემდგომი პილოტირებისათვის, რომელთა შორისაა ბსუ-ს ეკონომიკისა და ბიზნესის ფაკულტეტის სტუდენტების ნესტან ვარშანიძისა და გიორგი აბაშიძის პროექტი „ბეშუმის ტყე-პარკი“.

სახელმწიფო აუდიტის სამსახურსა და სახელმწიფო აუდიტის სამსახურის საჯარო აუდიტის ინსტიტუტთან ბათუმის შოთა რუსთაველის სახელმწიფო უნივერსიტეტმა თანამშრომლობის მემორანდუმი გააფორმა. ხელშეკრულება ითვალისწინებს თეორიული და პრაქტიკული სასწავლო კურსის განხორციელებას. სასწავლო კურსი მიზნად ისახავს სტუდენტებისა და თანამშრომლებისთვის საჯარო აუდიტის დარგის სიახლეების გაცნობას, პრაქტიკული უნარ-ჩვევების განვითარების, გამოცდილების მიღებისა და შრომის ბაზარზე კონკურენტუნარიანობის გაზრდის ხელშეწყობას. ვიზიტის ფარგლებში სახელმწიფო აუდიტის სამსახურის საჯარო აუდიტის ინსტიტუტის დირექტორი გელა წიკლაური, სახელმწიფო აუდიტის სამსახურის აჭარის დეპარტამენტის წარმომადგენლები რექტორთან მერაბ ხალვაშთან ერთად, ეკონომიკისა და ბიზნესის ფაკულტეტის პროფესორ-მასწავლებლებს, სტუდენტებს შეხვდნენ და სამომავლო თანამშრომლობის გეგმები გააცნეს.

22-24 ნოემბერს, პარიზში სორბონას უნივერსიტეტში გამართულ საერთაშორისო სამეცნიერო კონფერენციის „მოწინავე კვლევები სოციალურ მეცნიერებებში“ მუშაობაში მონაწილეობა მიიღეს ეკონომიკისა და ბიზნესის ფაკულტეტის ასოცირებულმა პროფესორმა ბადრი გეჩბაიამ და პროფესორმა გელა მამულაძემ. მკვლევარებმა კონფერენციაზე წარადგინეს პოსტერ-პრეზენტაცია. წარდგენილი პრეზენტაცია ეხებოდა ბსუ-ს მიზნობრივი სამეცნიერო საგრანტო პროექტის: „ქართული წარმოების ზოგიერთი პროდუქციის კონკურენტუნარიანობის კვლევა ადგილობრივ ბაზარზე“ კვლევის შედეგებს.

ბათუმის შოთა რუსთაველის სახელმწიფო უნივერსიტეტში საკონსულტაციო კომპანია „ჯეპრას“ დამფუძნებელმა სოსო გალუმაშვილმა ჩაატარა ვორქშოფი „როგორ შევქმნათ ინოვაციური ბიზნესმოდელი“. შეხვედრას ესწრებოდნენ ბსუ-ს ეკონომიკისა და ბიზნესის ფაკულტეტის პროფესორ-მასწავლებლები და სტუდენტები, ასევე სხვა დაინტერესებული პირები. ვორქშოფი ეფუძნებოდა ალექს ოსტერვალდერისა და ივ პინიეს ბესთსელერში „როგორ შევქმნათ ბიზნესმოდელი“ განხილულ მეთოდოლოგიებს. ღონისძიების ფარგლებში მონაწილეებმა იმუშავეს კონკრეტული ორგანიზაციის ბიზნესმოდელზე, შეავსეს ბიზნესმოდელის ტილო (Business Model Canvas) და გააანალიზეს, როგორ შეიძლება გახადონ ბიზნესი უფრო ინოვაციური და მომგებიანი. შეხვედრა საკონსულტაციო კომპანია „ჯეპრას“ ორგანიზებით, ბათუმის შოთა რუსთაველის სახელმწიფო უნივერსიტეტის, გამომცემლობის "პალიტრა L" და პროექტის „ლურჯი ოკეანე“ მხარდაჭერით შედგა.

ეკონომიკისა და ბიზნესის ფაკულტეტის დეკანმა, პროფესორმა ვლადიმერ ღლონტმა მონაწილეობა მიიღო ლისაბონის უნივერსიტეტის ეკონომიკისა და მენეჯმენტის სკოლაში გამართულ საერთაშორისო სამეცნიერო კონფერენციაში „ეკონომიკური პოლიტიკისა და თეორიის განვითარება“. მკვლევარმა სამეცნიერო სესიაზე წარდგენილი მოხსენებით განიხილა საქართველოს საზოგადოებრივი განვითარების აქტუალური საკითხი - ქვეყნის მაკროეკონომიკური პოლიტიკის ეფექტიანი რეალიზება, რომელიც საფინანსო, ეკონომიკური, კულტურული და პოლიტიკური ცხოვრების საკითხებთან ერთად, საზოგადოებრივი ურთიერთობების თითქმის ყველა ასპექტს მოიცავს.